“ახალი თაობა” თამარ ნინიძე 08. 11. 2012

• სახალხო პარტიის თავმჯდომარე მამუკა გიორგაძე საქართველოში დაპირისპირებებისა და დაუსრულებელი პოლიტიკური კრიზისების მიზეზად წარსული პოლიტიკური მოვლენების შეუფასებლობას მიიჩნევს, მისი ინიციატივაა, რომ შეიქმნას 2003-2012 წლების მოვლენების შემსწავლელი სახელმწიფო კომისია, რომელიც პოლიტიკურ შეფასებას მისცემს იმ პერიოდში განვითარებულ პროცესებს.  `ახალ თაობას~ მამუკა გიორგაძე ესაუბრა.
  _ თქვენი აზრით რატომ დაბრუნდა ბაჩო ახალაია საქართველოში?
  _ ბაჩო ახალაია, არა მგონია ის გულადი ვაჟკავი იყოს, რომ ერთბაშად მიიღო გადაწყვეტილება სახელმწიფოს ბედზე ზრუნვით და როგორც მართალი კაცი, თავისუფლად მოგზაურობს და მოძრაობს.  ასეთი რომ იყოს, იმ  დანაშაულებს არ ჩაიდენდა, როგორი ეჭვებიც არის მასზე, ვფიქრობ, რაღაც პოლიტიკურ გადაწყვეტილებასთან გვაქვს საქმე.
  _ მაინც რა ვარაუდები და ეჭვები გაქვთ?
  _ ბევრი ვარაუდი შეიძლება მქონდეს, სამწუხაროდ ამ პროცესების შუაგულში არ ვტრიალებთ, ამიტომ ზუსტი ინფორმაცია ნაკლები გვაქვს,   ბევრი ვარაუდი შეიძლება გამოითქვას ამასთან დაკავშირებით.
  _ ითქვა, რომ განადგურებულია ყველა სამხილი, რომელიც ახალაიას რაიმე დანაშაულებრივ ქმედებას წარმოაჩენს და ციხეში საბოტაჟის, ბუნტის მოთავე ბაჩოა და დაბრუნდა საქართველოში, რომ მის მიერ დაწყებული არეულობა ციხეებში გააკონტროლოს.
  _ ასეთი მებრძოლი გგონიათ თქვენ ან ვინმეს ახალაია, რომ ჩამოვიდა ღიად აქ პოლიტიკური ბრძოლების საწარმოებლად და აქვს შესაბამისი იდეოლოგიური მოტივაცია? მე ეს უფრო პოლიტიკური გადაწყვეტილება მგონია, თვითონ ის ფაქტი, რომ ახალაია ასე თავისუფლად ბედავს ინტერვიუების მიცემას და დიდაქტიკური განცხადებების გაკეთებას, ეს ყველაზე უფრო შემაშფოთებელია. თუ საზოგადოებამ ჩათვალა, რომ უკვე ყველაფერი დამთავრდა და  შეიძლება ფეხი-ფეხზე შემოვდოთ და მშვიდად ვიყოთ, არ ვიცი. არის თუ არა დამამტკიცებელი მასალები, ამ მასალების მეტი რა იქნება? ამას რა გააანდგურებს. ჩემთვის ის უფრო შემაშფოთებელია, რომ ნაცმოძრაობის ლიდერები ასე თავისუფლად ახერხებენ საკუთარი პოზიციების და აზრების გამოთქმას თითქოს არც არაფერი მომხდარა საქართველოში. მეორეც იქმნება ისეთი შთაბეჭდილება, რომ გარკვეულწილად მოქმედი ხელისუფლებაც დაინტერესებულია იმით, რომ ოპოზიციაში სწორედ ნაცმოძრაობის წარმომადგენლები ჰყავდეს, იოლი გასამარჯვებელი არიან ეს ადამაინები, სიბრძნეც რომ თქვან გაბაშვილმა, მინაშვილმა და სხვებმა, ამათგან თქმული ნებისმიერი ფრაზა მიუღებელია ქართული საზოგადოებისთვის. სჯობს ხელისუფლებამ უფრო მკვეთრი ნაბიჯები გადადგას იმ კრიტერიუმების შესამუშავებლად, რომელიც უნდა დაინერგოს საქართველოში, კერძოდ, რა კრიტერიუმებს უნდა აკმაყოფილებდეს საქართველოში პოლიტიკური ფიგურა იმისათვის, რომ რომ მას ჰქონდეს მორალური უფლება იწოდებოდეს პოლიტიკური სპექტრის წარმომადგენლად. ეს თუ არ დაინერგა, საქართველოში ჩვენ კვლავ მივიღებთ საქართველოში ძალიან მძიმე სურათს, ეს იქნება სტიმულირება ნებისმიერი ადამიანისთვის, რომ შეგიძლია ჩაიდინო ნებისმიერი ქმედება და არავინ ამის გამო არ მოგთხოვს პასუხს. მე არ ვარ იმის მომხრე, რომ მოხდეს მასობრივად დასჯა, მაგრამ საქართველოში ოთხჯერ-ხუთჯერ შეიცვალა წყობა და სახელმწიფოებრივი აღმშენებლობის ვექტორი, მაგრამ პოლიტიკური პასუხისმგებლობა არავის არასოდეს არაფერზე აუღია. თუ ახლა მაინც არ იქნა ტირანია შეფასებული, ეს იქნება ნებისმიერი ადამიანისთვის სტიმული რომ ჩაიდენს პოლიტიკური მოტივით დანაშაულს,  ეპატიება და შერჩება. ასევე ახალაიასავით ჩამოვა საქართველოში და მზადყოფნას გამოთქვამს, რომ უპასუხოს პროკურატურის კითხვებს. როგორ არის რომ უბრალო დანაშაულზე ადამიანს მკაცრი პასუხი მოეთხოვება და იმის გამო, რომ ადამიანმა მძიმე დანაშაული ჩაიდინა, რასაც ტრაგედია მოჰყვა, დაუსჯელი რჩებოდეს. ეს ადამიანები პარლამენტში და პარლამენტის გარეთ თავისუფლად დანავარდობენ და ჭკუას გვარიგებენ. ამას უნდა დაესვას წერტილი, თუ ივანიშვილის ხელისუფლებას სურს იყოს წარმატებული, უპირველეს ყოვლისა ამ მიმართულებით უნდა გამოიჩინოს მან აქტიურობა. იმიტომ, რომ სხვა პროცესებიც დამოკიდებული იქნება საქართველოში სამართლიანობის აღდგენასთან.
  _ როგორც მე გავიგე, თქვენ ახალ ხელისუფლებას საყვედურობთ უმოქმედობის გამო, ამ კონტექსტში ხომ არ იზიარებთ ზოგიერთი პოლიტიკური ძალის მოსაზრებას, რომ ნაცმოძრაობა უნდა გაუქმდეს, მაგალითად ამაზე ბურჯანაძის დემოკრატიულმა მოძრაობამ და სახახლო კრებამ გამოთქვეს ინიციატივა?
  _ მე მივესალმები ამ ინიციატივას, მაგრამ არასერიოზულია ასეთი განცხადებები. ჩვენ ჯერ უნდა შევაფასოთ რა მოხდა 2003 წელს. რაც მოხდა 2003 წელს, იმის შედეგია 2012 წელი, 2007 წლის 7 ნოემბერი, 2008 წლის აგვისტოს ომი, 26 მაისის დარბევა, ჩვენ პოლიტიკური შეფასება უნდა მივცეთ იმ მოვლენას რომელიც მოხდა 2003 წელს. შემდეგ ეს მოვლენა განვითარდა კლასიკური გაგებით, როგორც ვითარდება ბევრ ქვეყანაში, ტირანიის  ფორმით. თუ ახალაიაზე მოქმედებს უდანაშაულობის პრეზუმპცია, მაშინ მართალი ყოფილან ნაციონალები როცა ამბობენ კაცი ჯერ არ არის სასამართლოს მიერ დამნაშავედ მიჩნეული და მის ქმედებებს რატომ აძლევთ შეფასებებსო. თუ პოლიტიკურ შეფასებებს არ მივცემთ ამ მოვლენებს, საქმე გადავა სამართლებრივ ჭრილში, იქ მხოლოდ დოკუმენტურ მასალაზე იქნება საუბარი. ჩვენ კონკრეტული პიროვნებების რევანში კი არ გვაინტერესებს, ჩვენ გვაინტერესებს მოვლენების პოლიტიკური შეფასება. ეს არ უნდა განმეორდეს მომავალში. გერმანელებს დღესაც რცხვენიათ, როცა ფაშიზმზე საუბრობენ. ჩვენ ეს არც ერთხელ არ გავაკეთეთ. ჩვენ დღეს ვსაუბრობთ ბოლშევიზმზე როგორც ჩვეულებრივ მოვლენაზე, ჩვენ დღეს ვსაუბრობთ როგორც დაპყრობილი დამპყრობელზე, ჩვეულებრივად, თითქოს ბუნებრივ მოვლენაზე გვქონდეს საუბარი არა იმიტომ, რომ ვიღაცA კომუნისტი გავასამართლოთ, არამედ იმიტომ, რომ ბოლშევიზმი როგორც არსი დამღუპველია ჩვენთვის. შევარდნაძის საქართველოში ბოლშევიზმი ჩქეფდა, ჩვენ ეს არ გავასამართლეთ, პირიქით შევარდნაძე ყოველ ორშაბათს ჭკუას გვარიგებს `ასავალ-დასავალის~ ფურცლებიდან. “რევოლუცია” მოვაწყვეთ მაგრამ არ მივეცით შეფასება იმ მოვლენას, რაც იყო ამ რევოლუციის გამომწვევი. ცხოვრების ათვლა დავიწყეთ 2003 წლის ნოემბრიდან, მაგრამ რა იყო მანამდე, ამას არ მივეცით დოკუმენტური შეფასება, დღესაც სიტყვით ვსაუბრობთ ტირანიაზე, 1 ოქტომბრამდე სხვა საქართველოზე, მაგრამ არ ვცდილობთ, რომ მივცეთ ამას შესაბამისი შეფასება.
  _ როგორ უნდა მივცეთ შეფასება, უფრო კონკრეტულად რა გაქვთ მხედველობაში?
  _ დღეს პარლამენტში მიდის ჭიდილი იმაზე, ვინ უნდა ჩაუდგეს სათავეში საგამოძიებო კომისიას. ჩვენ გამოვდივართ ინიციატივით, შეიქმნას სახელმწიფო კომისია, რომელიც შეისწავლის 2003-2012 წლების მოვლენებს. ამ კომისიაში უნდა შევიდნენ ის ადამიანები, რომლებსაც წვლილი არ მიუძღვით ამ წლების მოვლენებში. ქვეყნის დამაქცევარი როლანდ ახალაია რატომ ზის პარლამენტში, ჩემთვის გაუგებარია. ეს სააკაშვილის ერთ-ერთი კლანის წარმომადგენელი თავხედურად აცხადებს, რომ კანონიერად არჩეულია ხალხის მიერ. ამას სჭირდება შეფასება. შვილი ჩამოვიდა ქვეყანაში სწორედ იმიტომ, რომ მამა დეპუტატი ჰყავს. პარლამენტში დეპუტატები არიან ის ადამიანები, რომლებიც ღიად მონაწილეობდნენ უკანონობებში. შეიძლება ნაყოფია და სხვები ისხდნენ პარლამენტში და ჩვენს ბედს განსაზღვრავდნენ. როცა ასეთი მამა დეპუტატია, რატომ გვიკვირს, რომ მისმა შვილმა თავისუფლად ინავარდოს თბილისში?
  _ როგორია თქვენი აზრი სამთვრობო კაბინეტზე? აქვე მინდა გკითხოთ რომელი მინისტრების მიმართ გაქვთ შენიშვნები და პირიქით, რომელი მინისტრები იწვევენ თქვენში დადებით დამოკიდებულებას?
  _ აქ პერსონალური საკითხი არ დგას. ყველამ კარგად ვიცით, რომ ქართული საზოგადოების ინტერესის სფეროს წარმოადგენს მხოლოდ პრემირ-მინისტრი, რომელმაც აიღო პირადი პასუხისმგებლობა საქართველოში მიმდინარე პროცესებზე.  იკვეთება ჩემთვის შემაშფოთებელი ტენდენციები, მაგრამ მთლიანობაში რომ ავიღოთ, არაობიექტურები უნდა ვიყოთ და ადამიანებს, რომლებიც მოვიდნენ ხელისუფლებაში, არ მიყვარს სიტყვა ვაცალოთ, მაგრამ მაინც უნდა მივცეთ დრო.
  _ შს მინისტრ ღარიბაშვილის მოადგილეების ლაშა ნაცვლიშვილის, ალეკო ტაბატაძის მიმართ არის კრიტიკული მოსაზრებები. ამიტომ გკითხეთ. ეს ადამაინები შევარდნაძის მმართველობასთან არიან გაიგივებულები, ნაცმოძრაობას მიეცა სალაპარაკო, რომ ივანიშვილი კაბინეტს ძველი კადრებით აკომპლექტებს.
  _ კარგია, რომ ეს კითხვა დამისვით მივედით იმ თემამდე, რასაც ჰქვია შევარდნაძის პერიოდი. რატომ არის ასე გამოყოფილი და ვინ შეაფასა როგორც უარყოფითი პერიოდი საქართველოში? ჩვენ ეს დასკვნა არ გაგვაჩნია. ამიტომ ყველა განიხილავს მისი გემოვნების მიხედვით. თუ არ შევაფასებთ სააკაშვილის პერიოდის მოვლენებს, ხვალ ისევ გაჩნდება უარყოფითი დამოკიდებულებები. ვიღაცა  მიაჩნევს, ესა თუ ის პიროვნება კარგი სპეციალისტია, ვიღაცა  მიაჩნევს პირიქით, არ შეიძლება მისი გაკარება ნებისმიერ სამინისტროსთან.